Kæru foreldrar

Skólastjóri kallaði nemendur í unglingadeild skólans á sal í morgun til að ræða umgengni um skólann.  Eins og þið vitið hafa nemendur í unglingadeild farið út á skólalóð í frímínútum tvo síðustu skóladaga, en hafa leyfi til þess að velja í dag um inni- eða útiveru í frímínútum.

Umgengni á unglingadeildargangi hefur verið ákaflega döpur undanfarið og í raun af og til í allan vetur.  Umsjónarkennarar hafa oft rætt þetta mál við sína bekki auk þess sem bæði skólastjóri og fulltrúar nemenda í skóla- og nemendaráðum hafa gert slíkt hið sama.  Nýlegir sófar sem keyptir voru í haust hafa til að mynda tvívegis verið skemmdir, ávöxtum og grænmeti er hent um ganginn auk þess sem skólatöskur og yfirhafnir fá stundum flugferð.  Þá hefur umgengni unglinga í matsal ekki alltaf verið til fyrirmyndar.  Sumir hverjir gera sér það t.d. að leik að beygja hnífapör, leika sér með vatn/mjólk, meðan aðrir ganga ekki frá leirtaui eftir sig og standa upp frá skítugum borðum í matsal.  Aðspurðir svara þeir því stundum til að skólaliðar geti bara gengið frá.

Ég ræddi við fjölda nemenda í gær og allir þeir aðilar voru á einu máli um að þetta væru lítill hópur nemenda sem gengi svona illa um.  Þetta ræddi ég líka við allan hópinn í morgun að láta sig málið varða og sætta sig ekki við það að lítill hópur gerði það að verkum að senda þyrfti alla út.  Því erfitt er fyrir starfsfólk að greina á fjölmennum ganginum og í matsalnum hverjir eiga nákvæmlega hlut að máli.

Það að senda alla út er í raun ekki heldur frábær aðferð en þegar núverandi ástand er óásættanlegt þurfum við að leita allra leiða.

Eftir að upplýsingar bárust foreldrum um að nemendur færu út í frímínútur bárust skólastjóra nokkur viðbrögð þar sem í meirihluta tilvika var verið að styðja skólann í baráttu fyrir bættri umgengni.  Í einhverjum tilvikum vakti ákvörðunin furðu.

Ég vil leggja á það áherslu að ef einhverjir halda að ákvörðun sem þessi sé geðþóttaákvörðun eins einstaklings þá er það af og frá.  Umsjónarkennarar, starfsfólk í félagsmiðstöð, skólaliðar og stjórnendur skólans hafa um málið að segja og allir þessir aðilar með stuðningi nemendaráðs hafa unnið að því í vetur að hvetja nemendur til bættrar umgengni.

Ég hvet ykkur til að ræða málin heima og hvetja ykkar börn til að stuðla að bættri umgengni í Áslandsskóla.  Öll viljum við hafa hreint og snyrtilegt í kringum okkur.

Skólakveðja

Leifur S. Garðarsson, skólastjóri