Grunnskólahátíð
Í dag höldum við skólar og
félagsmiðstöðvar Hafnarfjarðar upp á Grunnskólahátíðina.
Sýningar á atriðum frá öllum skólum fara fram núna kl:11.30, 13.00 og 14.30. En
krakkar frá okkur hafa lagt á sig mikla vinnu síðustu vikur að semja dansatriði
við lag úr söngleiknum Hairspray og vitum við að þau eiga eftir að vera okkur
til sóma.
Miðasala á ballið sem haldið er um kvöldið hefur farið fram síðustu vikuna og
lýkur miðasölu nú um 12:00. Það er mjög stór hluti unglingadeildarinnar okkar
að fara á ballið. Mæting er upp í Áslandsskóla kl:18.00 og er það mjög
mikilvægt að allir unglingarnir komi með okkur í rútunni upp á öryggi og til að
koma í veg fyrir öngþveiti á strandgötu. Uppi í skóla er farið yfir skráningu,
gerð er leit á krökkunum, farið er yfir allar reglur og öryggisatriði og þau fá
armband með númeri á. Með hópnum fara allir 6 starfsmenn Ássins, tveir kennarar
og ég deildarstjóri tómstunda.
Áætluð heimkoma er um 22.30 upp í Áslandsskóla og er mælst til að foreldra sæki
þangað ef unglingar eiga heima langt frá.
Mjög mikilvægt er að krakkarnir séu búnir að borða vel áður en þau mæta á
svæðið þar sem þetta er langur tími á ballinu, en það er sjoppa á staðnum þar
sem hægt verður að kaupa pizzusneiðar, kristal, gos og ýmislegt nammi - hægt
verður að borga með korti.
Þær reglur sem gilda á uppákomum á vegum félagsmiðstöðva eru þær að lagt er
bann við allri notkun áfengis, vímuefna, tóbaks, orkudrykkja, vape
(rafsígarettur) og gervimunntóbaks (kick-up).
Í allri starfssemi félagsmiðstöðva gilda þær reglur að kurteisi er höfð í
hávegum og farið er eftir fyrirmælum starfsmanna. Sé reglum ekki fylgt er haft
samband við foreldra eða forráðamenn og þeim gert að sækja sinn ungling.
Að lokum minnum við á að
skólarnir eru búinn að gefa frí í fyrstu tveim kennslustundunum á morgun.
Það á við alla sama
hvort þeir fara á ballið eða ekki.
- Eldri færsla
- Nýrri færsla