Nám og kennsla
Skólasetning
Á heimasíðu skólans er hægt að finna hvernær hver árgangur á að mæta við skólasetningu. Byrjað er á sal þar sem bekkirnir eru lesnir upp og síðan fer hver bekkur með sínum kennara í sína heimastofu. Foreldrar eru velkomnir með börnum sínum.
Skólaslit
Hver árgangur hefur sinn tíma þar sem hluti af honum er í stofu og hluti á sal. Hjá 10. bekk eru skólaslit eingöngu á sal þar sem foreldrum er boðið að vera með og er að lokum boðið í kaffi á eftir.
Skóladagurinn
Skóladagurinn í Áslandsskóla byrjar kl. 8:10, frímínútur eru kl. 9:30-9:50 og kl. 13:20-13:35. Hádegishlé hjá 1-5 bekk er frá kl. 11:10-11:35 og frímínútur frá 11:35-12:00. Hjá 6.-10. bekk er hádegishlé frá 11:10-12:00 og er matartíminn frá kl. 11:35.
Kennsluaðferðir
Í Áslandsskóla eru fjölbreyttir kennsluhættir og metnaðarfullt starf. Markmið og kennslutilhögun er að finna í bekkjarvísi hvers árgangs sem má skoða á heimasíðu skólans.
Heimanám
Heimanám er eðlilegt framhald af vinnu nemenda í kennslustundum.
Stefna Áslandsskóla er sú að venja nemendur á að skila heimavinnu samviskusamlega allt frá upphafi skólagöngu. Heimanám er þroskandi og hvetur nemandann til ábyrgðar á námi sínu.
Hverju barni er nauðsynlegt að foreldrar styðji og taki þátt í menntun þess. Stuðningur getur birst á ýmsan hátt, s.s. að foreldrar sjái til þess að börn þeirra fái næði til heimanáms, nauðsynlega hvíld, hollt fæði og mæti stundvíslega í skólann með þau gögn sem til er ætlast.
Í gegnum heimanámið gefst foreldrum tækifæri til að fylgjast með því námsefni sem börnin vinna með í skólanum og námsframvindu barna sinna. Það gefur þeim aukna möguleika á að bæta árangur þeirra í námi.
Að hausti skulu kennarar gera nemendum og foreldrum grein fyrir þeim kröfum sem gerðar eru til heimanáms. Mikilvægt er að nemendur skili heimaverkefnum á tilsettum tíma og að vinnubrögð séu til sóma. Öll ástundun náms er metin til einkunna og er hluti af skólaeinkunn. Sérstök umsögn um heimavinnu er á vitnisburðarblaði í 1.-7.bekk.
Markmið heimanáms er að:
- Ljúka verkefni sem byrjað var á í skóla
- Rifja upp og byggja ofan á það sem þegar hefur verið kennt í skólanum
- Undirbúa vinnu fyrir kennslustund
- Kanna skilning
- Vinna sjálfstætt og auka sjálfsaga
- Nota efni og upplýsingar sem ekki eru til staðar í skólanum, s.s. viðtöl við foreldra, heimildarleit o.fl.
Hlutverk kennara gagnvart heimanámi
- Útskýrir væntingar sínar til heimanáms fyrir foreldrum og nemendum
- Kynnir foreldrum námsefni og námsleiðir
- Gefur greinagóðar upplýsingar um heimanámið s.s. í vikuáætlunum, námsáætlunum, foreldraviðtölum og/eða á samstarfsfundum
- Eldri færsla
- Nýrri færsla